Jack Ma awmna chin hriat a ni lo

Chinese tech billionaire leh Alibaba founder Jack Ma chu China president Xi Jingpin kaihhruai Central Communist Party sorkar nen an inhmuh thiam loh hnuah thla hnih dawn chu vantlang hmuhin a inlan tawh lo.

The Telegraph, UK-in a tarlan dan chuan  business tycoon hi ama talent show ‘Africa’s Business Heroes’ final episode-a judge tur a ni a, mahse mak tak maiin hetah hian a inlan lo a ni. Show website aṭang pawhin a thlalak an paih niin an tarlang zui bawk.

Chinese mi hausa tawntaw hi China sorkar chuan a chhui chiang mek a, kar eng emaw zat a awmna chin hriat a nih tawh loh avang hian a bo nia rinna a lian tawh hle. Africa’s Business Heroes-a a inlan loh avang hian a aiawhin Alibaba executive dang a inlan a, Chinese e-commerce giant hian  Financial Times hnena an sawi dan chuan  schedule an siamah thil buai deuh a awm avangin a inlan lo niin an sawi thung.

Ma compay Alibaba leh a kaihhruai Ant Group-te chu  monopolistic kalpui nia puh an nih avangin China sorkarin a chhui zui mek a ni. Asia rama mi hausa ber nia chhal mek Jack Ma hian tun hnaiah a hausakna a hloh nasa hle niin repot ṭhenkhat chuan an tarlang a, thla thum liam ta chhung khan US dollar tluklehdingawn 11 lai a hloh a, nikum October thlaah khan a hausakna chu US dollar tld 61 hu a nih laiin tunah chuan US dollar tld 50.6 hu vel a ni tawh niin an tarlang.

Jack Ma hi kum 56 a ni tawh a, Forbes-in khawvela mi thiltithei list a tarlanah 21-na niin Fortune-in World's 50 Greatest Leaders list a tihchhuahah pawh pahnihna a ni tawh bawk. September 2018 khan Alibaba aṭangin a retire dawn tih a puang a, educational work, philanthropy leh environment ṭhatna tur kawng lamah a insawr bing dawn tih sawiin kum 2019 khan executive chairman a nihna chu bansanin a aiah Daniel Zhang chuan he dinhmun hi a chelh zui a ni.