US-in student visa 6,000 chuang titawp

US State Department chuan US dan bawhchhiat vangin international student visa 6,000 chuang an titawp. Visa tihtawp sak zinga a tam zawk hi zu rui chunga motor khalh, rukru leh firfiak zawnga chetna thlawptute an ni tih an sawi.

State Department hian visa tihtawp chhan pakhat, firfiak zawnga chetna thlawp a tih hi eng ang tak nge a sawi chiang lo a, mahse a hmain sorkar chuan Palestinian thlawptu, Juda-te thliar hrang leh huatna lantirtu zirlaite chu a lo khak tawh a ni.

Kumin kumtir khan US sorkar chuan international student visa a pek chhuah chu a titawp lailawk a, June thla aṭang khan pe chhuak ṭan lehin diltute chu an social media account thlengin enfiah an ni tawh a ni. An social media post leh comment-ah US mi leh sa, culture, sorkar, institution leh US thuthlungte sawisel leh kalh sawi an neih leh neih loh thlengin an endik tawh a ni.

Kum 2023-24 chhungin US-ah hian ram hrang hrang 210 chuang aṭangin international student mtd 1.1 chuang an awm a ni tih ram dang zirlai data lakhawmtu, Open Doors chuan a tarlang.