Ministop-in expiry date dik lo vangin rice ball hralh titawp

Japan-a convenience store chain Ministop chuan rice ball, onigiri an siamah staff-ten expiry date dik lo an bel tih an hmuh chhuah avangin dawr 1,600-a an hralh chhuah an la titawp chhunzawm zel.

Rice ball an pek chhuah hi dawr ṭhenkhata staff-ten siam zawh hnu lawkah label bel nghal mai loin, darkar hnih hnuahte a expiry date pawtseiin a lo dah tih hriat chhuah a ni. Hetianga dik lo taka an lo bel hi an ram chhunga dawr 23-ah report a awm. Dawr awmna zingah hian Tokyo, Kyoto leh Osaka khawpuite pawh an tel.

Expiry date dik loa dah tih an hriat hnuah August 9 aṭang khan an dawr tam zawkah onigiri hralh chhuah hi an titawp a, he thil thleng hi chhui chian a nihna turin hralh chhuah tihtawp hun hi Thawhṭanni khan an pawtsei leh a ni. Company chuan Thawhṭanni khan ngaihdam dilna a tichhuak a, customer lam aṭangin an rice ball chungchangah insawiselna neih phah report engmah an dawn loh thu an tarlang bawk.

Ministop hi kum 1980-a din a ni a, Japan-a convenience store lian panga zingah a tel a, dawr hi 1,800 chuang an nei. An dawrah hian ei tur tharlam siamin sandwich, snack leh bento box te an larpui hle.