House of Representatives speaker atan Nancy Pelosi thlang nawn

US House of Representatives speaker atan Pathianni khan Nancy Pelosi chu thlan nawn leh a ni a, he dinhmun hi vawi li a chelhna a ni.

Pathianni khan US Congress-ah House of Representatives speaker thlanna hi neih a ni a, he hunah hian Democratic candidate Nancy chuan vote 216 hmuin hnehna a chang a, a khingpui Republican hruaitu Kevin McCarthy chuan vote 209 a hmu thung.

Speaker thlanna neihah hian House member ṭhenkhat chuan Covid-19 an kai avang leh hriselna lama harsatna an neih avangin vote an thlak thei lo. 

117th Congress-a House of Representatives-ah hian Democrats hi 222 an awm a, Republicans hi 211 an awm thung. Democrats pahnihin Nancy hi vote loin midang an vote a, a dang pathum chuan vote an thlak lo a ni.

Thlan nawn leh a nih chung changah Nancy chuan party speaker a nih dawn loh thu leh, House speaker tawp a nih dawn thu a sawi. "Kan khawtlangah Covid-19 hri lengin harsatna a thlen mek a, he hri vang hian US-ah mi 3,50,000 chuang an thi tawh a ni. He hri vang hian hna chan maktaduai tel an awm tawh a, hri leng nuai reh leh do hi kan thil tih tum pawimawh leh ṭul ber a ni a, he hri leng hi kan do zel dawn a, kan hneh ngei ka ring bawk," tiin kum 80 mi Nancy chuan speaker atan thlan nawn leh a nih chungchang, a hmachhawpte a sawi.

Kum 2007 khan Nancy hi House of Representatives-a hmeichhe speaker hmasa ber a ni a, kum 2009 khan thlan nawn leh niin, kum 2011-19 inkar khan House Minority Leader a ni bawk. January 3, 2019 khan House of Representatives speaker atana thlan a ni leh a, January 3, 2021-ah a vawi lina atan thlan nawn leh a ni. 

In hnih rorelna bicameral legislature, United States Congress-ah hian House of Representatives leh Senate an awm a,  Washington DC-a Capitol building-ah Congress member-te hian ro an rel ṭhin a ni. 

Congress-ah hian member vote 535 a awm a, heng zinga 100 chu Senator an ni a, House of Representatives member chu 435 an ni thung.