Sweden-ah kum 113-a upa biak-in building sawn

Sweden hmar lama biak-in lar tak, kum 113-a upa Kiruna Church chu a building pumin km 5-a hlaah an sawn.

Kiruna Church, an hnam ṭawnga Kiruna Kyrka an tih bawk hi kum 2002 khan ram puma vote laknaah 1950 hma lama in sak zinga mawi berah thlan a lo ni tawh a ni. Kiruna khua hi khawvela iron ore mine lian ber zinga mi awmna bul maia awm a ni, khur laih nasat avang hian khawpui chhunga building ṭhenkhat dinhmun chu a him lo thei nia sawiin, kum 2004 aṭang khan building tam zawk chu sawn a ngaih thu official-ten an lo sawi tawh a ni. Hei vang hian Kiruna Church pawh hi hmun him zawk,kum 2018-a khawpui thar an dinah an sawn a ni.

Biak-in an hnuhsawn hi ton 672-a rit niin, thinga sak a ni.A hnuh kalnaah hian wheel 224 dah a ni a, fimkhur taka hnukin darkar khatah km chanve vel zelin an hnuk sawn a, ni hnih chhungin an sawn fel thei a ni. Biak-in hi thawm ṭhain, nakkum kumtawp lamah an hawn beisei a ni.