Afghan mi thawn kirte phurtu motor chesualah mi 73 thi

Iran-a Aghanistan mi awm, an ram lama thawn kir tur phurtu motor chu Thawhlehni zan khan Afghanistan ram chhung, Herat province-ah a chesual a, mi 73 an thi. Thi zingah hian naupang 17 an tel.

Bus hi Kabul pan tur a ni a, Herat province-a truck nen insuin a kang zui niin Taliban sorkara information and culture director, Ahmadullah Mottaqi chuan a sawi. Bus-a chuangte an thi vek a, an bula tlan motor danga chuang pahnih an thi tel bawk a ni. Iran sorkar hian an rama document nei loa tlan lutte dap chhuah leh thawn haw hna a kalpui a, July thla thleng kha dan loa lutte an rama kir turin hun a pe a ni. Mahse, June thlaa Israel nen a indo hnuah, Afghan mi awm tam takte chu an ram tan a him lo thei nia ngaiin mi sang tel chu a thawn haw tawh. Kumin January thla aṭangin Iran-a Afghan mi awm zinga mtd 1.5 chuang chuan an chhuahsan tawh niin UN Refugee Agency chuan a tarlang.

Afghanistan-a Taliban-te ro an rel aṭangin mi tam tak ram dangah an tlanchhia a, a tam zawk chu Pakistan leh Iran-ah an lut. Iran bakah Pakistan pawhin document felfai nei loa Afghan mi lutte thawn kir hna hi a kalpui bawk a ni.