NKorea hnena silai thawntu kum 8 tang dawn

US justice department chuan North Korea-a silai leh sipai hmanraw dang thawntu, China mi Shenghua Wen, kum 42 mi chu kum riat tang turin hrem a ni tih a sawi.

Shenghua Wen hian California aṭanga bungruate NKorea-a thawn turin NKorea official-te hnen aṭangin USD mtd 2 vel a dawng tih an tarlang bawk. A thiltih avang hian kum 2024 December khan hrem a ni a, a thubuai ngaihtuah a nih hnuah hremna hi tihchhuah a ni.

Wen hi Ontario, California-a cheng niin kum 2012-ah student visa hmangin US-a lut a ni a, a visa hi kum 2013 December thleng dam ni mah se a visa thih hnuah pawh a awm chhunzawm a ni. US a luh hma aṭangin China-a NKorea embassy-ah NKorea official-te a hmu a, anni hian ralthuam thawn tur hian a lo hrilh niin justice department chuan a tarlang. A pawisa dawn hmangin Houston-ah silai zawrhna hmun a lei a, Texas aṭangin California-ah phur chhuakin, hemi aṭang hian lawngin NKorea-ah a thawn a ni. Kum 2023 khan silai dahna bawm lian pathum chu China kaltlangin NKorea-ah a thawn a, bawm-a bungrua awm chungchangah dawt a sawi bawk.