China-in 13th Five-Year Plan hmang zo

Communist Party of China (CPC) Central Committee chuan an ramin 13th Five-Year Plan 2016-2020 chhunga an thil tum hrang hrangte tih hlawhtlin a nih a tarlang a, heng an plan zinga retheihna umbo tura hma lakna kawngah pawh hma an sawn hle tih an tarlang bawk.

Kum 2020 November thla khan China-a county (ram bial) rethei 832 chu county reithei list-a an telna aṭangin China sorkar chuan a telh tawh lo a, heng county bakah hian China chhimthlang lama awm Guizhou province pawh rethei list-ah hian an awm tawh lo bawk a ni.

China president Xi Jinping chuan thingtlanga cheng mi retheite kum 2020-ah chuan retheia chhinchhiah an ni tawh loh chu, CPC Central Committee-in a thil tum a tih hlawhtlinna pakhat a nih thu a sawi. China-ah hian county 52 chu rethei list-ah an la awm tho a ni. 

Covid-19 hri lo chhuahna China hi nikum khan hri leng vangin an ram economy a tlachhe hman hle a, mahse Xi Jinping kaihhruai sorkar chuan theihtawpin hri dona kawngah hma a la a, inkhuahkhirhna khauh tak sorkar chuan hmang nghalin, nikum kum laihawl aṭang kha chuan an ram economy pawn dinhmun ṭha a rawn pan chho leh thei ta a ni. 

Nikum 3rd quarter, July-September thla chhunga China Gross Domestic Product (GDP) punna chu 4.9% a ni. Quarter hmasaa (April-May, 2020) China GDP (ramchhunga an thilsiam chhuah leh thar chhuah) punna hi 3.2% chauh a ni thung a, 1st quarter (January-March) ah phei chuan -6.8% a ni. Nikum 4th quater October-December thla chhunga an GDP punna chu 5.8% ah a chho. Kum 2019 3rd quarter-a China GDP kha 6.2% a ni a, kum 2019 nena nikum kum tir lama quater tin khaikhin chuan khawvela ram economy lian ber dawttu China hian hri leng a tuar nasa hman hle tih a hriat theih. 

Kum 2015 aṭanga tehin China hian carbon dioxide emission hi 13th Five-Year Plan chhung kum 2016-2020 khan 18% in an tihniam hman a ni. 

Energy lamah China hian kum 2020 hmain energy hman ral tam lohna turin target a siam a, 13th Five-Year Plan chhung khan 15% a tihhniam a tum a ni. Hemi kawngah hian China chuan an rama coal-fired boiler ṭhenkhatte chu a ti tawp a, coal-fired power plant siam belh pawh a khap bawk.

Boruaka bal a awm tam loh nan China chuan electric hmang lirthei hman a rawt a, emission pechhuak hnem lirthei maktaduai li dawn chu China chuan tlan a khap bawk a ni.