England-ah Lockdown puang leh

United Kingdom prime minister Boris Johnson chuan TV kaltlanga thu a sawinaah Thawhṭanni zanlai aṭang khan England-ah lockdown puan a nih thu a sawi.

Lockdown puan a nih chhan hi Johnson chuan an rama Covid-19 hri dang chi VUI-202012/01 a len chhoh mek vanga leh he hri kai an tam vang a nih thu a sawi. He hri hi Covid-19 hri pangngai aiin inkaichhawn a awlsam zawk tiin mithiamte chuan an sawi a, hei vang hian Johnson chuan he hri laka inven a nih theih nan hri dona atan pawimawh leh ṭha ber chu lockdown hman rih a ni, a ti.

Thu a sawinaah hian Johnson chuan an rama mipuite chu ṭul bik thil leh medical lam a nih loh chuan inlama tawm rih hram hram turin a chah a ni. Lockdown hi puan ni mah se hnathawh turte chu a huam dawn lo a, inlama hnathawk thei erawh inlama thawk hram hram turin Johnson chuan a chah bawk.

An rama Thawhlehni aṭangin school leh college-te chu khar a ni a, heng zirna inte hi February thla laihawl hma chu hawn tum a nih loh thu Johnson chuan a sawi. UK-ah hian Covid-19 hri kai tawh hi mi 27,13,563 an awm tawh a, heng zinga mi 75,431 chu he hri vang hian an thi tawh a ni.