Thailand PM hlui Thaksin Shinawatra thiam chantir

Thailand prime minister hlui Thaksin Shinawatra chu an ram lal chhungkua sawichhiaa puhna thubuaiah nimin khan court chuan thiam a chantir.

Thaksin-a ukil chuan thiam chantir a nih thu a sawi a, Bangkok Criminal Court chuan thuchhuah a la siam lo thung.

Thailand ramah hian an lal leh lal chhungkaw sawisel leh sawichhiat khapna dan, lese majeste law khauh tak an hmang a, dan bawhchhiate chu kum thum aṭanga kum 15 thleng lung-in tantir theih an ni.

Thaksin laka thubuai an siamsak hi kum 2014-a sipai chakna hmanga a farnu, Yingluck kaihhruai sorkar paihthlak a nih chungchangah lal chhungkua mi ṭhenkhat leh, lal thurawn petu, member 19 awmna privy council an inrawlh a rin thu South Korea chanchinbuin an kawmnaah a sawi vang a ni. Kum 2016 khan thubuai hi siam sak ni mah se hetih lai hi ram pawn lama a tlanchhiat lai a nih avangin a chungthu ngaihtuah a ni mai lo a, nikuma an rama a kir leh hnuah manin a thubuai hi ngaihtuah a ni. Bail-a chhuah tir a ni a, mahse Thailand ram pawnah court phalna lo chuan a zin phalsak a ni lo a, a passport pawh lak sak a ni bawk.

Lese majeste law hnuaiah hian mi eng emaw zat hrem an ni tawh a, tun hnaiah hmeichhe pakhat chu King Vajiralongkorn thlalak tarna bulah Covid hri veite puihna tur budget dah tlem lutuk sawiselna thu a tar avangin kum nga tang turin hrem a ni. A hma pawhin lal hlui, King Bhumibol ui leh kum zabi 16-na hunlaia Thailand lal sawiseltute pawh hrem an lo ni tawh bawk a ni.