Pakistan SC-in Imran Khan bail-a chhuah phalsak

Pakistan Supreme Court chuan an ram prime minister hlui, Imran Khan chu kum 2023, May 9-a tharum thawhna thleng kaihhanwihah thubuai pariat siamsak a nihnaah bail-a chhuah a phalsak.

Imran Khan hi kum 2022 April thla khan Pakistan prime minister a nihna aṭangin vote of no confidence hmangin paihthlak a ni a, thubuai eng emaw zat siamsak a ni zui bawk. A thubuai kaihhnawiha man a nih avangin, 2023 May 9 khan amah thlawptute chuan Islamabad-ah lungawi lohna an lantir a, tharum thawhna nasa tak thlenin sorkar building-te an suasam zui bawk. He pawikhawihna thlengah hian Imran Khan bakah a party, Pakistan Tehreek-e-Insaf (PTI) hruaitu eng emaw zat chu inrawlha puhin thubuai siamsak an ni.

Khan bail dilna Lahore Court-in a hnawlsak hnuah Supreme Court-ah a thlen leh a, chief justice Afridi kaihhruai judge pathum awmna bench chuan a ngaihtuah hnuin a phalsak ta a ni. Mahse, bail phalsak ni mah se a thubuai dang pakhat avangin Khan hi jail-ah a la awm chhunzawm dawn tho a ni. A thubuai hrang hrang avang hian Khan hi kum 2023 August thla khan man a ni a, Rawalpindi-a Adialla Jail ah a la tang mek a ni.