NKorea-in missile 2 enchhin

North Korea chuan Inrinni liam ta khan air defence missile thar pahnih a enchhin a, an enchhinaah hian an ram hotu Kim Jong-un pawhin a telpui tih state media chuan a tarlang. Korean Central News Agency (KCNA) chuan missile system thar pahnihte hi eng ang nge tih a sawi lang lo a, mahse special technology hmanga thuam a ni tih a sawi a, an enchhinna hun pawh a sawi lang lo a ni.

NKorea in missile a enchhin thar hi US leh SKorea in annual military joint drill an neih lai a ni a, NKorea chuan joint drill neih hi a sawisel fo a ni. Kar liam ta Thawhlehni khan SKorea chuan ramri, Demilitarised Zone (DMZ) kaltlanga an rama lut, NKorea sipai 30 an awm tih sawiin, heng mite warning nan silai pawh an hmetpuak tih an sawi.

Hetih lai hian SKorea president thar, Lee Jae Myung chuan NKorea nena an inkar boruak siamṭhat tumin hma a la mek a, ramria NKorea sawiselna lam thu tihchhuahna tur aurina an dahte pawh sipaite a lak thlak tir tawh a ni. President Lee hian vawiinah US president Donald Trump a hmu dawn a, Korea ram pahnih chungchang pawh an sawidun rin a ni.