Sri Lanka President Wickremesinghe man a ni

Sri Lanka president hlui Ranil Wickremesinghe chu a president laia sorkar sum dik lo taka hmanga puh a nihna thubuaiah Zirtawpni liam ta khan man a ni. Nimin khan a dinhmun a ṭhat loh avangin damdawi-inah dah luh a ni nghal bawk.

Sri Lanka president hlui pathum - Chandrika Kumaratunga, Mahinda Rajapaksa leh Maithripala Sirisena te chuan Wickremesinghe man a ni chu an dem thu sawiin, hrem a nih dan chu democracy palzutna a ni, an ti.

Wickremesinghe hi kum 2022 July - 2024 September chhung khan Sri Lanka President a ni. Kum 2023 September thlaa New York-a UN General Assembly leh Havana-a G77 summit a hmang, a haw lamah sorkar sum USD 55,000 chu a mimal thil atana hmanga puh a ni. Wickremesinghe chuan an puhna chu thu dik lo niin a sawi thung. A thubuaiah hian thiam loh chatir a nih chuan kum 20 lung-in tan tir bakah, a sum tihchingpen nia sawi let thum chawi tir theih a ni ang.

Kum 76 mi, Wickremesinghe hi diabetes leh thisen sang nei a ni a, man a nih hnuah Inrinni khan dehydration a neih nasat avangin Colombo-a damdawi-inah dah luh a ni. ICU-ah enkawl a ni a, a ngaihtuahawm lutuk lo nia sawi a ni.

President hlui Kumaratunga chuan Wickremesinghe man a nih dan chu democracy kalphung palzutna a ni tiin, he thil thleng hian an ram mipui zawng zawng dikna chanvo neihte pawh a nghawng tel thei tih a sawi. Mahinda Rajapaksa pawhin man a nih dan chu a dem thu sawiin, Inrinni khan damdawi-inah a tlawh nghal a ni. Kum 2018-a prime minister a nihna aṭanga Wickremesinghe bantu, president Sirisena pawhin man a nih dan chu mimal inbeihna, sorkar tharin eptu lamte awpbeh a tumna niin a sawi ve bawk.

Wickremesinghe-a party, United National Party (UNP) chuan thawm a neih len leh hlauh vangin lo dan chahna turin thubuai hi siamsak a ni tih an sawi. Wickremesinghe hian nikuma President thlannaah Anura Kumara Dissanayake a hneh zo lo a, mahse inthlan hnuah pawh politics a la khel zui reng tho a ni.