Australia-in Iran ambassador hnawt chhuak

Australia chuan Sydney leh Melbourne-a Juda mite huatna lantir leh beihna thlengah Iran sorkar a inrawlh nia puhin, an rama Iran ambassador chu a hnawt chhuak a, ni sarih chhunga Australia ram chhuahsan turin Thawhṭanni khan a hriattir.

Prime minister Anthony Albanese chuan nikuma Sydney leh Melbourne-a Juda-te beihna thlengah ram dang a inrawlh ngei tih a sawi. Nikum October thla khan Sydney-a Bondi huna Lewis Continental Cafe chu beih a ni a, December thlaah Melbourne-a Adass Israel Synagogue beih a ni bawk. Heng hmun pahnih beihnaah hian thi leh hliam erawh an awm lo. Pawikhawihna thleng hi an khawtlanga boruak chhia siam tumna a ni tiin, an pawmzam mai dawn lo tih PM chuan a sawi a ni. Iran-a Islamic Revolutionary Guard Corps (IRGC) chu firfiak pawlah an puang dawn tih a sawi.

Australia chuan Iran ambassador Ahmad Sadeghi leh official dang pathumte chu ni sarih chhunga an ram chhuahsan turin a ti a, Iran-a Australia ambassador pawh ko kirin Tehran khawpuia embassy pawh an khar rih bawk.

Foreign minister Penny Wong chuan Indopui II-na hnuah Australia-in an rama ram dang palai awm a hnawh chhuahna hmasa ber a ni tih a sawi a, Australia mite chu Iran-a zin lo tura a chah bakah, Iran-a Autralia mi awm mekte pawh chhuahsan turin a chah bawk a ni.

Australian Security Intelligence Organisation (Asio) hotu Mike Burgess chuan Australia-a Juda mite beihna dangah pawh Iran inrawlhna dang pawh a awm ngei nia an hriat thu leh, an chhui chian mek thu a sawi.

Iran chuan Australia-in a puhna leh, an ambassador a hnawt chhuah chungchangah sawi a la nei lo. Israel chuan Australia-in IRGC firfiak pawla a puang tur chu lawmawm a tih thu sawiin, Iran sorkar chu Juda leh Israel te tan chauh an hlauhawm lo a, Australia pawh huamin khawvel pum himna tiderthawngtu an ni, a ti.