Israel-in Gaza chhim lama hospital kap fuh

Israel sipaite chuan Thawhṭannia Gaza Strip chhim lam an beihnaah Nasser hospital an kap fuh a, mi 20 an thi. Thi zingah hian journalist panga an tel nia sawi a ni.

Israel prime minister Benjamin Netanyahu chuan hospital kah tel a ni chu pawi a tih thu a sawi a, tihsual pawi tak a ni tiin Israel chuan civil mite a bitum ngai lo tih a sawi. Journalist, medical staff leh buaina kara hnathawktute hna thawh chu a ngaihlu hle a ni, tih a sawi bawk. Hospital kah tel a nih chungcahng hi sipai lam hotuten an chhui chian mek thu a sawi.

Israel Defence Forces (IDF) pawhin thuchhuah siamin, buaina chhuaka inhnamhnawih ve lote tihnat tel an ni chu pawi an ti takzet tih an sawi a, journalist-te chu an bitum ngai lo tih an tarlang bawk. He thil thleng chungchang an chhuina pawh langtlang taka kalpuiiin, an puangzar dawn tih IDF thupuangtu, brigadier general Effie Defrin chuan a sawi.

Ram hrang hrang leh journalist group-ten hospital leh journalist-te beih tel an ni chu an dem thu an sawi a, Gaza Strip-a indona chu titawp thuai tura an phut thu an sawi bawk.