Greece mipuiten eurozone rawtna an hnawl

Leiba avanga buai mek, Greece ram mipuite chuan eurozone-in an ram leiba laka khaichhuahna tura rawtna a siam an hnawl. Hei vang hian ruahmanna thar siam leh a ngai dawn a ni.

Pathianni khan Greece mipuite hian euro­­zone rawtna siam chung­changah vote an thlak a, mahse a duh lohtu lamah vote a tla ṭha zawk a ni. Vote tla hi chhiar kim a ni tawh a, a duh lo lam 'No' tia vote lamah 61% tlain, rawtna siam thlawptu 'Yes' titu lamah vote 39% a tla.

Greece sorkar chuan eurozone rawtna siam hi a thlawp lo a, vote lak hma pawhin Prime Minister Alexis Tsipras chuan a duh lo lama vote turin mipuite a ngen a ni. Hemi rual hian a duh lam vote an tam zawk a nih erawh chuan mipuite duhdan chu an zahsak tur thu a sawi.

PM Tsipras chuan Pathianni-a vote thlak result chu lawmawm a tih thu sawiin, an ram tana hun ṭha inherna tur nia a ngaih thu a sawi. " Hun harsa ber karah pawh democracy chu khapbeh leh danbeh theih a nih lo tih kan lantir a ni" a ti.

Mipuite thutlukna siam chuan an ram tana inremna ṭha zawk siam turin a tha tihchak a nih phah dawn niin a sawi a, result chhuah aṭanga ni reilote chhungin inremna thar siam ngei an beisei thu PM chuan a sawi.

European official-te ngaihdan hriat a la ni lo a, vawiin hian Greece chungchang ngaihtuahin eurozone summit neih a ni ang. Germany Chancellor Angela Merkel leh France President Fran­cois Hollande-te chuan Greece mipuite duhdan chu an zahsak tur thu an sawi.

Eurozone finance minister meeting, Euro­group hotu Jeroen Dijs­selbloem chu vote thlak result chu Greece hma­lam hun atana thil pawi tak nia a ngaih thu a sawi. "Greece ram sum dinhmun siamṭha tur chuan, ruahmanna hautak leh khirh tak siam a ngai a ni. Tunah chuan Greece thuneitute hmalak tum dan kan nghah a ngai dawn ta a ni" a ti.

Mipuite ngaihdan lak a nih tak avangin Greece sorkar chuan sum puktirtu nena inbiakna chhunzawm dan kawng a zawn nghal dawn a, leiba neihte ngaihnathiam tur leh, banking sector pawh dan pangngai kaltir leh tura a ngen a ngai dawn a ni. PM Tspiras chuan sum puktirtu, European Central Bank, European Commission leh Interna­tional Monetary Fund-te chu Greece leiba, dollar tluk­lehdingawn 267 chung­changah hmalak dan thar ngaihtuahin inbiakna a neihpui ang.

Vote thlak dawna mipuite hnena 'No' ti lama thlak tura ngentu, Greece finance minister, Yanis Varoufakis chu result puan a nih hnuah minister a nihna aṭangin a bang. Varoufakis chuan an ram sum dinhmun siamṭhatna tura kawng an zawnaah eurozone finance minister-te nen chuan an inhnial buai fo a, minister a nihna aṭanga ban tir chu an duh a ni, a ti. "Hei vang hian ka awm loh hi kan ram buaina chinfelna kawngah a ṭha zawkin ka ring a ni" tiin a sawi.