Australia PM-in talk show boycott turin a hrilh

Australia Prime Mi­nis­ter Tony Abbott chuan a cabinet pakhat hnenah an rama TV talk show tihchhuah lar tak pakhat chu boycott turin a hrilh.

Australian Broad­cas­ting Corp (ABC) chuan talk show, Q&A program a buatsaih ṭhin a, he show hi an ramah chuan a lar hle. Mahse kar hnih liam ta khan ABC hian live show program a buatsaihah hian firfiaka rinhlelh mi pakhat chu a tel tir a, hei vang hian sawisel pawh a tawk nasa hle.

Agriculture Minister Barnaby Joyce chu nizana show neih tura tel tura ruat a lo ni tawh a, mahse nimin khan a ṭhulh a ni. Minister office chuan show-a inlan a ṭhulh chhan chu PM in a ngen vang niin a sawi. Minister thupuangtu chuan PM hian Q&A prog­ram-ah sorkara mi pawi­mawhte chu tel lo tura a duh thu a sawi a ni, a ti.

ABC hian firfiaka rinhlelh tawh, Zaky Mallah an live show-a zawhna zawt tura an lantir chu an tisual hle tih an pawm thu a sawi tawh a ni. Mallah hi kum 2005 khan sorkar officer ṭhenkhat thaha vaua puh a nih vangin thiam loh chantir a ni tawh a, firfiak nia puhna erawh chu tihtawp sak a ni.

Mallah hian Q&A audience-ah telin, Foreign Affairs Parliamentary Secretary Steven Ciobo chu firfiakte thlawptu nia hriatte dual citizenship sorkarin paihtlak a tum dante a zawt a, an inhnial zui a ni.