Philippines-ah MERS vei hmuh belh

Philippines ramah Middle East Respiratory Syndrome (MERS) vei pahnihna hmuh chhuah a ni leh.

MERS vei an hmuhchhuah hian June thla khan Dubai a tlawh a ni. A hri vei hmuhchhuah a nih hnu hian damdawi-inah dah nghal a nih thu Health Ministry thupuangtu, Lyndon Lee-suy chuan a sawi.

Januarty thla khan Philippines rama MERS vei hmasa ber chu hmuhchhuah a ni a, Saudi Arabia-a nurse hna thawk ṭhin a ni. Mahse enkawl a nih hnuah a hri vei lak aṭang hian a fihlim tawh a ni.

MERS hri vei tamna, South Korea ramah chuan nimin thleng khan he hri vei finfiah hi mi 186 an tling tawh a, an zinga mi 33 ten an thihpui tawh a ni.

South Korea rama MERS vei enkawl zingah 117-te chu damdawi-in aṭanga chhuah tir an ni tawh a, hetihlai hian mi 12-te erawh chu an dinhmun a la ṭha lo hle.

May 20 khan SKorea-ah hian MERS vei an awm tih hi hriatchhuah ṭan a ni a, hemi hnu hian hri veite nena intawk leh awmtlang, mi 16,326 chu enfiah tura dahhran an ni tawh bawk. Nimin thleng khan enfiah tura an dahhran zingah mi 15,419 te chu chhuah tir an ni tawh.