Khawvel Lawrkhawm
Bulgaria PM a bang
Bulgaria Prime Minister Boyko Borisov chu president thlannaah, a nominee a tlin zawh loh avangin PM a nihna aṭangin a bang.
President thlannaah hian eptute candidate, Russia thlawptu lam Rumen Radev chu thlan tlin a ni. PM chuan inthlan result aṭang hian an party chuan majority a nei ta lo tih a lang nia sawiin, parliament inkhawm neih veleh a kaihhruai sorkarah banna chu thehluh a tum tih a sawi.
Bulgaria president atana thlan thar, Radev hian vote tla aṭangin 60% dawn a hmu pha a ni. Radev hi European Union-in Russia a hrekna titawp tura phuttu zinga mi a ni. NATO member Bulgaria chuan Russia nena inzawmna ṭha zawk neih dan a ngaihtuah a ngai niin a sawi.
New Zealand-ah lirnghing vangin mipui tangkhang an tam
New Zealand ramah lirnghing vangin lei a min nasa hle a, leimin hian kawngpuite a danchah avangin lirnghinna bialah mi tam tak an tangkhang.
Lirnghing inṭanna, Canterbury bialah chuan state of emergency puan a ni tawh a, Hurunui leh Kaikoura district-a khualzin leh tualchhung mi tangkhangte hruai chhuak tur hian helicopter tirh a ni. Chhanchhuah hna thawhna kawnga pui tur hian Canterbury tuipuiah lawnglian, HMNZS Canterbury leh HMNZS Wellington-te thawn an ni bawk.
Prime Minister John Key chuan, lirnghing vanga harsatna tawk mekte ṭanpui hna thawhna kawngah US Navy chuan an puih thu a sawi a, US President-elect Donald Trump pawhin a be tawh niin a sawi.
Palestinian-te’n Israel bill siam tum dodal
Palestinian offiial chuan Israel sorkarin bill siam thar a tum chu an duh lo tih sawiin, UN-ah zualko an tum thu an sawi.
Pathianni-a Israel cabinet meeting chuan bill pahnih siam tum chu an thlawp a, bill pakhat zawk hi West Bank-a dan loa in sak ṭhiahsak ṭhin tihtawpna tur a ni a, pakhat dang chu sakhaw inkhawmna hmun aṭanga pawn lam hriat tura thawm bengchheng tihchhuah ṭhin khapna tur a ni a, hei hian Muslim-te a thlurbing bik nia sawi a ni.
Muslim mosque aṭang hian nitin ṭawngṭai tura insawmna hi aurinna hmangin vawi nga tihchhuah ziah a ni ṭhin. Prime Minister Benjamin Netanyahu chuan mi tam tak hnen aṭangi mosque aṭanga au ri bengchheng an nin thu complaint hi a dawng fo niin a sawi.
Palestinian Minsiter of Waqf and Religious Affairs Yousef Ideiss chuan, Israel sorkar bill siam tum hian ësakhaw indonaí a chawh chhuah mai a hlauhawm thu a sawi. Palestinian President thupuangtu, Abu Rudeina chuan Israel thil tum dang tur hian ramdangte puihna an zawn tur thu a sawi bawk.