Mosul-a inbeihnaah IS firfiak 57 an thi

Iraq sipaite chuan Islamic State (IS) firfiak kut aṭanga an ram khawpui lian pahnihna, Mosul khua laklet tumin beihpui an thlak chhunzawm zel a, Mosul khaw chhak lama an inbeihnaah IS firfiak mi 57 an thi tawh nia sawi a ni.

Counter-Terrorism Service (CTS) chuan IS suicide bomber-teín Mosul khaw chhak lam, al-Qadsiyah leh Zahraa district-a sipaite hmun beih an tumna eng emaw zat chu an lo dang niin CTS deputy commander Lieutenant General Abdul-Wahab al-Saadi chuan a sawi. Sipaite hian firfiakte hi lo bei letin, thihchilh bomb tipuah tumtu mi 26 an lo kaphlum niin a sawi.

Sipaite hian khawpui chhak lam bial aṭangin Mosul khawpui chhung luh tum hian an bei ngawrh hle a, mahse firfiakte hian an lo beih let nasat avangin hma an la sawn chak thei lo.

Egypt sipai 16th Division leh an thurualpui, Sunni tribal fighter-te chuan IS hi Mosul hmar lam aṭangin an bei bawk a, IS hmun pawimawhte beiin an motor pahnih an kahchhiat sak a, firfiak 31 an that bawk.

Mosul chhim lamah 9th Division-te chuan al Naiyfa khua chu firfiakte kut aṭangin an la tawh a, he khua hi Mosul aṭanga km 30 vela hlaa awm niin, Pathianni khan sipaite hi khawchhungah an lut tawh a ni.

Khawthlang lam aṭaning Shiite Hashd Shaabi paramilitary unit chuan Mosul khua hi an pan bawk a, Mosul aṭanga km 70 vela hla, Tal-Afar khua an lut a, firfiakte kut aṭang hian thingtlang khaw pali an laksak tawh bawk. Tal Afar khua hi kum 2014 khan IS firfiakten an la a ni.