Sri Lanka President hlui bail dilna phalsak

Sri Lanka president hlui, a mimal thil atana sorkar sum hmanga puh vanga man, Ranil Wickremesinghe-a bail dilna chu Thawhlehni khan Colombo Magistrate Court chuan a phalsak.

Kum 76 mi, Ranil Wickremesinghe hi nikuma London-a a zin ṭumin, a mimal thil atan sorkar sum, USD 55,000 hmanga puh a nih avangin kar liam ta Zirtawpni khan man a ni. Mahse, man a nih hnu lawkah a hriselna dinhmun ṭhat loh vangin tan-in damdawi-inah dah a ni a, a hnuah Colombvo National Hospital intensive care unit-ah sawn a ni. Diabetes a neih bakah thisen sang a nei bawk.

Wickremesinghe bail dilna ngaihtuah a nih lai hian court pawn lamah amah thlawptu mi eng emaw zat an pungkhawm. Court-ah amah a inlan thei lo a, ICU aṭangin web link hmangin a lo zawm a ni. Magistrate Nilupuli Lankapura chuan Wickremesinghe bail dilna remtih sakin, rupee mtd 5 dahkham turin a ti bawk.

Sri Lanka President hlui zingah Wickremesinghe hi man tawk hmasa ber a ni. Kum 2022 July thla mipui nawrh huaihawt avanga president a nihna aṭanga Gotabaya Rajapaksa paihthlak a nih hnuah, parliamentary vote hmangin president atan thlan tlin a ni a, kum 2024 thleng khan office a luah a ni. President a nih hma hian prime minister ṭum ruk a ni bawk. Wickremesinghe thupuangtu chuan President hlui hi a ngaihtuahawm lo a, mahse damdawi-inah hun eng emaw chen chu enkawl chhunzawm a la ni dawn tih a sawi.

Wickremesinghe party, United National Party (UNP) chuan an party hotu puh a nihna chu thu dik lo a nih thu an sawi a, thubuai siamsak a nih chhan pawh rorellai party-in politics hmanga an beihna mai a ni tih an sawi.