Russia-in drone leh missile hmangin Kyiv a bei leh

Russia chuan Nilaini zan khan drone leh missile hmangin Ukraine khawpui, Kyiv a bei leh a, mi 10 an thi a, mi dang 38 an hliam. District pasarihah chenna in leh building eng emaw zat a chhia tih Ukraine official-te chuan an sawi.

Ukraine president Volodymyr Zelenskyy chuan an ram beih a ni leh chu US president Donald Trump-a'n indona tihtawp a nih theihna hma a lak mekna Russia-in a chhan dan a ni tiin,"Russia chuan inbiakna dawhkan kil aiin ballistic a thlang zawk a ni," a ti. Kyiv khawpui beihnaa thi zingah hian naupang pawh a tel tih a tarlang.

Ukraine air force chuan Russia-in drone a kah chhuah 598 zinga 563 leh missile 31 zinga 26 chu an kap thla niin an sawi. Russia hian hmun hrang hrang aṭanga an kah avangin an lo dang vek seng lo a, Kyiv khawpui hi hmun 13 velah an kap fuh tih an sawi a ni.

European Union commissioner Marta Kos chuan Russia beihna avangin Kyiv-a European Union mission building pawh a chhe tel tih a sawi. Russia-in civil mite chenna bial a bei chu a dem thu a sawi a, an chetdan hian remna leh muanna siam tuma hmalak mekna chu a hnawl a ni, a ti.