Indonesia-a nawrh huaihawtte in halah mi 3 an thi

Indonesia-a Parliament member-te tana thla tina allowance pek belhna tur leh, education funding chungchanga lungawi lohna lantira zirlaite nawrh huaihawt chu a punlun zel a, nawrh huaihawtten council building an halnaah mi pathum an thi.

Jakarta-a kar hmasa Ningania Parliament bula nawrh an huaihawtnaa motorcyle-a chuang, kum 21 mi Affan Kurniawan chu police motorin a sut vangin a thi a, hei vang hian Zirtawpni khan zirlaite hi police headquarters-ah an pungkhawm zui bawk. Nawrh huaihawt hi ram chhung hmun hrang hrangah a punlun zel a ni.

President Prabowo Subianto chuan Zirtawpni zan khan Kurniawan chhungte a tlawh a, Inrinni khan China-a military parade neih tura kal a tum pawh a ṭhulh bawk. Social media TikTok pawhin buaina zual zel tur venna kawng khat atan Indonesia-ah live feature a titawp rih bawk. Indonesia-ah hian TikTok hmangtu hi mi mtd 100 chuang an awm.

Tun ṭuma nawrh huaihawt hi President Subianto-a'n thuneihna a chan hnua an rama nawrhna thleng lian ber a ni. Jakarta bakah khawpui lian hrang hrangah nawrh hi huaihawt a ni. Zirtawpni khan an ram khawchhak lam, Sulawesi thliarkara khawpui lian ber, Makassar-ah pungkhawmte chuan provincial leh city council building-te luh chilhin an hal a ni. City council building kangah hian mi pathum an thi a, mi dang pali pawh an kan nasat avangin damdawi-inah dah luh an ni bawk tih council secretary Rahmad Mappatoba chuan a sawi.