Myanmar sorkarin firfiak pawlah KNU a puang

Myanmar sipai sorkar chuan kar liam ta khan Karen hnam pawl, Karen National Union (KNU) chu firfiak pawlah a puang.

KNU hian kum 1948-a Britain aṭanga Myanmar independence hnuah Karen bial tan thuneihna sang zawk pek phutin an bei tawh a ni. Kum 2021-a sipai chakna hmanga civil sorkar paihthlak a nih hnuah, sipai sorkar nen hian an inbei zui reng bawk.

Sipai sorkarin firfiak pawla a puan chu an ngaih pawimawh loh thu KNU thupuangtu Padoh Saw Taw Nee chuan a sawi a, "Tunge firfiak dik tak ni zawk a, pawikhawihtu ni zawk chu sawichian kher a ngai lo," a ti. Sipai sorkarin December thlaa inthlanpui buatsaih a tum pawh KNU chuan tihbuai an tum thu an lo sawi tawh a, mahse, firfiak pawla puan an nih tak avangin an tan campaign kalpui erawh a harsat phah tawh dawn a ni.