China-in WHO expert team an rama luh phal lo

World Health Organization (WHO)-in China rama Covid-19 zirchiang tura expert team tirh luh a tumte chu China chuan an rama luh a phal loh vangin WHO director Dr Tedros Adhanom Ghebreyesus chuan a hrilhhai thlak thu a sawi. 

Thawlehni khan Tedros chuan international scientific team (expert)-te chu China-ah Covid-19 hri lo chhuah dan chanchin kimchang zirchiang tur leh, mihringa he hri lo darh chhoh dan zirchiang tura an kal thu a sawi a, mahse Chinese official-te chuan expert-te hi an rama luh an phal lo niin Tedros chuan a sawi a ni.

Hemi chungchangah hian Tedros chuan WHO leh China sorkar chuan hmun expert team zin tur hian a hmaa inremna an lo siam tawh thu a sawi. Expert zin tur zinga mi pahnih chuan an chenna ram an chhuahsan tawh tih Tedros chuan a sawi a, midang chuan an la chhuahsan hman lo niin a sawi bawk. Zin tur chungchangah hian Chinese official-te a biak reng thu Tedros chuan a sawi a, official-te hnenah hian hri leng zirchian chu WHO leh international scientific team-te hmalakna pawimawh a nih thu hrilh nawn leh a tum tih Tedros chuan a sawi.

China chuan a hmain WHO expert team-te hi an rama Covid-19 hri zirchiang tura zin a phal dawn thu a lo tarlang tawh a ni. Nikum July thla khan WHO chuan Covid-19 hri lo chhuah dan chanchin kimchang zirchiang tur leh, mihringa he hri lo darh chhoh dan zirchiang turin international scientific team (expert)-te chu China ramah a tir dawn tih a puang a, an zir chian hun chhung tur hi thla ruk aia tam a ngai dawn niin a sawi a ni.

Covid-19 hri hi kum 2019 December 12 khan Hubei province-a Wuhan-a ram sa zawrhna hmun, wet market aṭanga rawn inṭan nia ngaih a ni. Wet market hi China chauh ni lo, Asia ram dangah pawh hmun pawimawh tak niin, thlai thar, sa leh sanghate zawrhna hmun a ni a, hmun tam zawkah chuan ramsa hi zawrh tel a ni ngai lo. 

Mahse Covid-19 hri hi wet market aṭang hian a rawn in ṭan reng em tih chu hriat chian a ni lo a, sawi dan hrang hrangah chuan China siam ni hiala sawite pawh a awm. Hengte avang hian he hri lo chhuah dan chanchin kimchang zirchiang tur leh, mihringa he hri lo darh chhoh dan zirchiang turin WHO chuan expert-te chu China-ah tirh luh a tum phah ta a ni.

US president Donald Trump chuan Covid-19 hri len ṭan tirh khan China chuan a thup a ni tiin a lo sawi tawh a, he hri darh tur venna kawngah a tirah khan China chu a inthlahdah niin a lo sawi tawh bawk.

Trump chuan Covid-19 chu China Virus tiin a sawi zui phah a, WHO leh China chu ṭang dunah leh thil thup ṭhenah a lo puh tawh bawk a ni.  US secretary of state Mike Pompeo pawhin China sawisel ve bawkin he hri chungchangah hian thuchiang engmah an tarlang duh lo niin a puh ve bawk a ni.

US sorkara senior official Garrett Grisby chuan World Health Organization (WHO) chu China ramsa aṭanga conoravirus lo chhuah dan chungchang a chhuina chanchin kimchang a tarlang duh lo niin a sawi a, hei vang hian WHO leh China chu a ruka thawk dun nia sawi a ni. 

UN health agency member-ten meeting an neihnaah US department of health and human services-a senior official Garrett Grisby chuan WHO-in coronavirus a chhuina, China mission a neih chanchin kimchang chu ramdangte hriatah a tarlan loh thu a sawi a, ramsa aṭangin he hri hi a rawn darh chhuak reng em tihte chu hriat chian a la nih loh thu a sawi bawk. 

Johns Hopkins University tarlan dan chuan khawvel pumah he hri kai tawh hi mi maktaduai 85 chuang an awm tawh a, heng zinga mi maktaduai 1.8 chu he hri vang hian an thi  tawh a ni.