Indonesia party-ten roreltute hamṭhatna pekna tur tihtawp remti

Indonesia president Prabowo Subianto chuan sorkarin roreltute tana thla tina housing allowance pekna tur a siam duh lohna lantira zirlai pawl kaihhruaia nawrh huaihawt a nih hnuah, political party hrang hrangte chuan hamṭhatna pekna tur hi titawp an remti tih a sawi.

Kar liam ta Thawhṭanni aṭang khan an ram sum leh pai dinhmun ṭhat tawk loh laia Parliament member-te housing allowance tam tham pekna tur siam chu duh loin nawrh huaihawt a ni a, Zirtawpni khan nawrh huaihawtnaah police motorin motorcycle suin a driver a thi a ni. Hei vang hian buaina a punlun a, political party member leh state building-te beih leh hal a ni zui a, council building halnaah mi pathumin an thih phah a ni.

President Prabowo chuan tualchhung buaina thleng vangin China a zin tur pawh a ṭhulh a, Pathianni khan Presidential Palace-ah cabinet member-te nen inhmukhawmin, buaina thleng mek chungchang an sawi ho. Buaina punlun zel avangin President leh minister te bakah, sorkar building hrang hrangte pawh uluk zawka ven an ni bawk.

Indonesia-a zirlai pawl lian ber, All Indonesian Students’ Executives Body hruaitu Muzammil Ihsan chuan Parliament-te hamṭhatna pek tihtawp ringawt chu a tawk lo tih sawiin, sorkar chuan an ram harsatna chu a bulṭhut aṭanga a chinfel a ngai a ni, a ti.