Israel beihpui thlaknaah Hamas thupuangtu Abu Obeida a thi

Israel chuan an sipaiten Inrinni liam taa Gaza City an beihnaah Hamas armed wing, al-Qassam Brigades thupuangtu, Abu Obeida a thi tih Pathianni khan a sawi.

Defence minister Israel Katz chuan Obeida thah a nih avangin X-ah Israel Defence Force (IDF) leh security agency, Shin Bet a lawmpuina thu a tarlang. Hetih lai hian Hamas lam chuan Obeida chungchang hi an la sawichiang duh lo thung a, Israel beihpui thlakna avangin civil mi eng emaw an thi tih chauh an sawi a ni.

Katz chuan pawikhawihna thlenna kawnga Obeida thurualpui dangte pawh an bitum zel dawn tih a sawi. IDF leh Shin Bet chuan a hranin Hamas thupuangtu an beih dan an tarlang bawk. A birukna hmun hi Shin Bet leh IDF Intelligence Directorate in an chhui a, an hriat hnuah a bihrukna in chhawng ruka sang chu hmun hnih aṭangin missile-in an kap tih an sawi.

Obeida hi kum 2023 October 7-a Hamas-ten Israel an beih lai khan military wing senior member a ni tawh a, member zinga a tam zawk chu Israel-in a beih letnaah an thi tawh. Obeida hi kum 40 bawr vel nia rin a ni a, al-Qassam Brigades hmingin Israel huatna leh sawichhiatna thu a tichhuak fo a ni. Palestinian scarf-in a hmai a tuam reng a, Hamas thlawptute ngaihsan a hlawh ṭhin hle. Kar liam ta Zirtawpni pawh khan Israel-in Gaza City lak a tum chungchangah Israel chu a vau a ni.

Israel cabinet chuan August thla tir lam khan Gaza Strip-a Hamas nen thla 22 chhung an indo tawh tihtawp a nih theihna turin Gaza City pumpui lak a, an thununna hnuaia dahna tura ruahmanna siam chu a lo pawm tawh a ni.