Houthi-ten Yemen khawpuia UN staff 11 an hreng

Yemen helpawl, Iran-in a thlawp Houthi chuan an ram khawpui, Sanaa Israel sipaite beihpui thlaknaa an prime minister a thih hnuah, Pathianni khan United Nations office pahnih luh chilhin thawktu mi 11 an hreng.

World Food Programme (WFP) leh United Nations children’s agency (UNICEF) office-te chu Houthi sipaite chuan Pathianni zing khan an luh chilh a, heng office-a thawktu ṭhenkhat chu an hreng zui a ni.

UN secretary-general Antonio Guterres chuan Houthi helpawl chetdan chu a dem thu sawiin, an mi hrente chu chhuah nghal turin a phut. Kum 2021 aṭang khan Yemen-ah hian UN tana thawktu bakah, NGO leh civil society tana thawkte pawh hren an lo ni fo ṭhin niin a sawi. Mi dangte chhawmdawl leh ṭanpui hna thawktu, UN leh a thawhpuite chu bitum tel an ni tur a ni lo, a ti. Houthi mi hrente him taka chhuah an nih thuai theihna atan UN chuan theihtawp a chhuah dawn tih a sawi.