Jack Ma a bo lo

Asia pa hausa, Alibaba founder Jack Ma chu a bo nia rinhlelhna lian hle mah se a bo lo niin media ṭhenkhat chuan an tarlang a, vantlang hmuhah a inlan duh rih lo mai niin an tarlang.

Journalist David Faber, CNBC market news analyst chuan hemi chungchang hi report-in Jack Ma chungchang hrechiangtu tak pakhatin hemi chungchang hi a sawi niin a tarlang a ni. "Vantlang mithmuhah a inlan lo a ni mai thei, mahse a bo lo. Alibaba-in hmunpui an neihna hmun Hangzhou-ah a awm mai thei," tiin CNBC anchor chuan a sawi.

Faber chuan Jack Ma chu a duhthu renga mi tam tak hmuh tura inlan lo a nih thu sawiin, chutiang chuan hun eng emaw chen chu a awm zui a beiseiawm zawk mah tih a sawi. PRC (People’s Republic of China) sorkar nen inhmuh thiam lohna an nei a, hun kal tawhah khan hetiang thil hi a lo tawng fo tawh a, buaina erawh a nei ngai lo, tiin CNBC anchor chuan amah hrechiangtu tak pakhat thusawi a sawi chhuak.

Chinese mi hausa tawntaw hi China sorkar chuan a chhui chiang mek a, kar eng emaw zat a awmna chin hriat a nih tawh loh avang hian a bo nia rinna a lian hle. Africa’s Business Heroes-a a inlan loh avang hian a aiawhin Alibaba executive dang a inlan a, Chinese e-commerce giant hian Financial Times hnena an sawi dan chuan schedule an siamah thil buai deuh a awm avangin a inlan lo niin an sawi a, mahse hemi hnu hian a bo niin mi tam tak chuan an ngai a ni.