Colombia-a district pathumah lockdown puang

Colombia rama Covid-19 hri kai an tam chhoh avangin, an rama mi maktaduai 2.5 chenna hmun district pathumah Thawhlehni khan lockdown puan a ni. 

Nikum November thla chhung khan Colombia-ah hian Covid-19 hri kai thar nitinin mi 8,000 chuang an awm ziah anga chhut a ni a, nikum December thla khan mahni khuaa chawlh hmanga haw an tam avangin hri hi an inkaidarh chho mek a, hei vang hian hri kai hi an pung a, mipui chen tamna leh hri kai an tamna hmun district-ahte hian lockdown hi sorkar chuan a puan phah ta a ni.

Colombia khawpui lian ber dawttu Medellin-ah hian hri kai an tam avangin zan dar 10 aṭangin zing dar 5 thleng curfew puan a ni dawn a, hei hi kar leh thleng hman tur a ni. Medellin bakah hian zan lama curfew hi Cali leh khaw ṭhenkhata hman tur a ni bawk. 

Colombia-a Caribbean coast-ah hian nikum December thla khan chawlh hmanga zin an tam hle a, tun thlengin a hri leng vanga la thangkhangte pawh an la awm. He hmunah hian zan lama curfew puan a ni bawk. Tun hnai khan Colombia ramah hian nitina Covid-19 hri kai thar mi 11,000 chuang an awm ziah thu health lama thuneitute chuan an tarlang. Hei vang hian khawpui ṭhenkhata ICU-a awm pawh an pun phah a, ICU-a awm 90% chu hri kai enkawl mekte an ni. 

Colombia-ah hian Covid-19 hri kai mi 17,02,966 an awm tawh a, heng zinga mi 15,59,010 chu enkawl dam tawh niin, he hri vanga thi hi mi 44,426 an awm tawh.