Nigeria-a naupang 75,000 te dinhmun a ṭha lo

United Nations chuan Nigeria hmarchhak lam, Boko Haram helte hluarna biala naupang 75,000 vel te chu ei tur tlachham mai thei dinhmunah an ding mek niin a sawi a, an dimhmun a ṭhat loh thu a tarlang.

UN humanitarian co-ordinator Peter Lundberg chuan hmarchhak bialah hian mi maktaduai 14 vel chu chhawmdawl ngaiin an awm tih a sawi a, heng mite ṭanpuina pe vek tur hian UN chuan sum a ngah tawk lo tih a sawi bawk.

Lundberg chuan hmarchhak biala cheng mi nuai li-te chu, thla reilote hnuah ṭanpuina pek an nih loh chuan rilṭamin an thi mai dawn niin a sawi a, heng zingah hian naupang 75,000 zet an tel a ni, a ti. Kumin July thla khan UN chuan hmarchhak lam Borno biala naupang awm, hmun li-a ṭhena hmun khat chu an mamawh ang ei tur
ṭha hmu pha lo an nih thu a lo tarlang tawh a ni.

Boko Haram hel hian kum 2009 aṭang khan Borno state leh a chhehvel bialah Islamic state din tumin sorkar lakah an hel a, tualchhung inbeihna thleng avang hian mi sing tel chu an thi tawh a, mi maktaduai hnih chuang chu hmun him lamah an tlanchhe tawh bawk.