Khawvel Lawrkhawm

Trump-a’n a cabinet tur ngaihtuah tan

US President-elect Donald Trump chuan Vice President-elect Mike Pence leh Republican party hruaitute kawmin, a cabinet atana ruat turte a sawipui mek.

Presidential transition team chuan cabinet formation chungchangah official-a thuchhuah la nei lo mah se, New York Mayor Rudy Giuliani chu Secretary of State atan dah a ni dawn nia sawi a ni. Ani bakah hian Indian-American Louisiana Governor Bobby Jindal chu Secretary of Health, Alabama Senator Jeff Sessions chu Defence Secretary leh Steven Mnuchin chu Treasrury Secretary atan an hming sawilan a ni bawk.

Israel-in Turkey-a Israel ambassador tur a ruat

Israel chuan Turkey nen an inkar boruak a ṭhat leh tak avangin, Turkey rama ambassador turin veteran diplomat Eitan Naíeah a ruat thar. Cabinet pawhin a pawm tawh a, Turkey lam pawhin Israel-a an ambassador dah tur a puan ve thuai rin a ni.

Kum 2010, May thlaa Israel sipaiten Gaza Strip pan tumtu, Turkey lawngrual an beih avangin ram pahnihte inkar boruak hi a chhe chho a, kum 2011 khan Turkey chuan an rama Israel ambassador Gabby Levy chu a hnawtchhuak. Hemi hnu hian ram pahnihte hian ambassador hi an dah tawn lo zui ta a ni. Mahse ram pahnihte hian an inkar boruak chhia siamṭhat tumin inbiakna an nei a, kumi June thla khan Israel Prime Minister Benjamin Netanyahu leh Turkey President Recep Tayypi Erdogan-te chuan inremna an siam thu an puang.

US-in tharum thawhna thleng tihtawp turin Myanmar a ngen

Myanmar khawthlang lam, Rakhine state-a tharum thawhna thlengah kar kalta chhung khan security force chuan Rohingya Muslim mi 70 dawn an that a, US chuan tharum thawhna leh inthahna thleng titawp tura hma la turin Myanmar sorkar a ngen.

State Department thupuangtu Elizabeth Trudeau chuan, US palaite chuan Myanmar sorkar aiawhte biain, Rakhine state dinhmun siamṭha tur leh, Rohingya Muslim-te thah an nih chungchang langtlanga chhui turin a ngen. Rakhine state-a buaina thlengah hian police 10 leh sipai pasarih an thi tel bawk. Rohingya Muslim-te hi Myanmar sorkar chuan khua leh tui nihna a pe duh lo a, zirna leh hnathawhna kawngah pawh khuahkhirhna siamsak an ni.