Russia-in ICC zawm tumna titawp dawn

Russia President Vladimir Putin chuan Russia-in Interna-tional Criminal Court (ICC) zawm tumna titawp tura hma-lakna chu a pawm.

Russia hian ICC zawm tur hian kum 2000 khan Rome statute a lo sign tawh a, mahse member ni tura inremna erawh a la pawm lo a ni. Mahse ICC-in Russia-in Crimea bial a luah chu sipai hmanga tihluihnaa laksak nia a sawi avangin ICC a zawm tumna hi a titawp dawn a ni.

Court chuan kum 2014-a Russia-in Crimea peninsula a lak chu an ram leh Ukraine inkar buaina avanga sipai hmanga a laksak niin a sawi. Mahse hei hi Russia chuan a hnawl a, Kremlin thupuangtu Dmitry Peskov chuan court thutlukna siam chu thu dik tak kalh nia sawiin,
ṭan lam nei leh a thutlukna chu rin tlak tawk lo niin a sawi.

ICC thutlukna avang hian Russia-in Crimea bial a luah chung-chang hi court-in a rel fel a ngai dawn a ni. Hemi hma hian kum 2008-a South Ossetia-a Russia-Georgia buaina pawh ICC hian chhui chiang turin a lo ti tawh bawk.

International crime pali - mipuite suatna thleng, mihring laka pawikhawihna thlen, war crime leh midang chunga invaivung chungchang thubuaite ngaihtuahna turin ICC hi din a ni. US chuan Bill Clinton-a President-na hnuaiah khan ICC zawm tur hian Rome statute hi a lo sign tawh bawk a, mahse George W Bush hunlai khan a inhnukdawk leh a ni. Sudan leh Israel pawh an lo inhnukdawk tawh a, China leh India erawh chuan member ni tura an thil phutte chu an hnawl nghal a ni.

Kumin kumtir lam kha South Africa, Burundi leh The Gambia ramte chuan ICC aṭang hian an lo inhnukdawh tawh bawk a, Africa ram dangte pawhin member an nihna hi ngaihtuah ṭhat an tum thu an sawi bawk. Africa ramte chuan ICC hi thliar bik neiah leh, Africa ram chungchang buaipui bik lutukah an puh.