Orthodox Jew-te'n Israel bill siam tur dang

Israel sorkarin sakhaw biak-in aṭanga thawm bengchheng tihchhuah khapna bill siam a tum chu Israel ultra-Orthodox Jews te chuan an dang.

He bill hi sakhaw tin huam tura tih ni mah se, Muslim mosque aṭanga aurinna hmanga ṭawngṭai tura sawmna ri tihchhuah ṭhin khapna tur deuh bika ruahman a ni. Prime Minister Benjamin Netanyahu pawhin bill siam tum hi a thlawp.

Tunkar chhungin bill chungchang hi Parliament-ah sawichhuah tum mah se, ultra-Orthodox United Trorah Judaism party member, Health Minister Yaakov Litzman chu inrawlhin, bill hi ngaihtuah nawn turin a ti. Litzman chuan he bill hi hman a nih chuan Juda mite ṭawngṭaina hun hman dan thlengin a nghawng thei dawn niin a sawi. Minister a inrawlh tak vang hian bill hi ministerial committee-in a ennawn a, vote a lak leh phawt a ngai dawn a ni.

Arab MP-te pawhin he bill siam tum hi an duh lo hle a, Juda leh Muslim-te sakhaw biakna kalphung hrek tumna a ni, an ti. Israel-a hian Arab hi 17.5% vel an awm a, an zinga a tam ber chu Muslim an ni.