Serbia ramah inthlan ṭhat phut

Serbia khawpui, Belgrade-ah Thawhṭanni zan khan railway station chung chima mi 16 thite hriatrengna hun hmangin kawng zawh a ni a, kawngzawhte chuan president Aleksandar Vucic kaihhruai sorkar paihthlak a nih theihna atan inthlan ṭhat buatsaih an phut. Khawpui hrang hrangah huaihawt a ni bawk.

Belgrade-a hun hmanah hian Savski Trg square-ah zirlai 16-te chuan nikum November thlaa Novi Sad-a rel station chung chimin a delh hlumte hming an chhiar chhuak. He chhiatna thleng hi sorkar lam inthlahdah leh thuneitute eirukna nasat vangin an puh a, hei vang hian inthlan ṭhat buatsaih an phut a ni. He thil thleng kaihhnawihah hian mi 13 chu thubuai siamsak niin, an zingah hian transport minister hlui Goran Vesic pawh a tel. Hetih laia trade minister, Serbia Railways hotu ni bawk Tomislav Momirovic pawhin banna a theh luh phah bawk a ni.

Zirlaite huaihawtin ṭum eng emaw zat lungawi lohna hi lantir a ni tawh a, boruak muanawm tak hnuaiah neih a nih ṭhin laiin kumin August 13 khan nawrh huaihawtte leh police-te innawr buaiin mi eng emaw zatin hliam an tuar a ni.