Sudan-ah leimin vangin mi 1,000 chuang thi

Sudan ram khawthlang lam, Darfur bialah Pathianni khan leiminin Tarasin khua a hnawl a, mi 1,000 chuang an thi tih helai bial thununtu, helpawl Sudan Liberation Movement-Army chuan a sawi.

Tarasin khua hi Marrah tlangdunga awm niin, kar hmasa lam khan ni eng emaw zat ruah nasa takin a sur a, Pathianniah chhiatna rapthlak tak hi a thleng ta a ni. He khuaa cheng zinga mi pakhat chauh a dam chhuak niin thuchhuah an siamah an tarlang. UN leh chhawmdawlna hna thawktu pawl hrang hrangte ruang lak chhuah hna thawhnaa pui turin an ngen nghal bawk.

Marrah Mountains hi Sudan sorkar sipai leh paramilitary Rapid Support Forces (RSF) te inbeih nasatna hmun aṭanga km 160 vela hlaa awm a ni a, pawl pahnihte inbeihna avangin mi tam tak chu tlangdunga khaw hrang hrangah hian an tlanchhia a ni. Sudan sipai leh RSF te hi kum 2023 April thla aṭang khan a inbei tawh a, an inbeihna avang hian mi 40,000 chuang an thih tawh bakah, mi maktaduai 14 vel chu an tlanchhe tawh a ni.