Vietnam-in Independence Day lawm

Vietnam chuan nimin khan France awpna aṭanga an ram zalenna an puan champha vawi 80-na lawmin, military parade pui tham tak a buatsaih. Independence Day lawmna pual hian mi tang 14,000 dawn chhuah zalen an ni bawk.

An ram khawpui, Hanoi-a Ba Dinh Square-a military parade neihah hian Russia siam Mi-171 helicopter, Sukhoi Su-30 fighter jet bakah ram chhunga an siam drone-te pholan tel a ni. Ba Dinh Square hi kum 1945, September 2-a revoluionary leader, Ho Chi Minh-an France laka an ram zalenna a puanna hmun a ni. Independence a puan hnuah hian Vietnam sipaite chuan First Indochina War-ah France hi do zuiin, kum 1954 indona hi a tawp a, an ram hi US thlawp chhim lam bial leh hmarlam Communist thlawp lamah a inṭhen a, bial pahnih hi indo zui lehin Vietnam War a thleng zui a ni. Kum 1975, April 30 khan Saigon chu Communist sipaite lakah a tlawm a, indona tawpin an ram pawh pumkhatin an awm zui ta a ni.

Military parade-ah hian sipai 16,000 vel an tel a, Vietnam siam bakah China, Russia leh ram dang ṭhenkhat sipaite an tel ve bawk. A hranpain an ram chhim lama lawng chawlhna hmunpui, Calm Ranh-ah lawng leh tuihnuai lawngte pholan an ni bawk.