Chhawmdawlna tihtawp vangin naupang mtd 6-in sikul kal thei dawn lo : UNICEF

United Nations Children Fund, UNICEF chuan zirna atana ram hrang hrangte chhawmdawlna an pek ṭhin tihtlem leh tihtawp a nih avangin nakkum, kum 2026-ah naupang maktaduai ruk vel chu sikul kal chhunzawm thei loin an awm dawn tih a tarlang.

Official-te chuan nakkumah zirna lam kaihhnawiha fund an dawn hi 24% velin a tlahniam dawn niin an chhut. Sum dawn tlakhniam chhan tur hi donor lian pathum - US, Germany leh France te sum pek tihtawp tum a nih vang nia sawi a ni. Hei hi an ti tak tak a nih chuan nakkum kum tawpah sikul kal chhunzawm thei lo naupang hi mtd 6 vel an awm belh dawn a, an vaiin mtd 278 an tling tawh dawn a ni, an ti.

UNICEF executive director Catherine Russell chuan zirna atana sum pek tihtawp chu naupang hmalam hun thlenga nghawng tur a ni tih sawiin, a bikin Haiti, Somalia leh Palestinian ram dinhmunte a ngaihtuahawm zual niin a sawi. Africa khawthlang lam leh a ram laili lamte chu a nghawng nasa ber tur a ni tiin, naupang mtd 1.9 chu zirna chhunzawm thei lo tur dinhmunah an ding mek tih a sawi bawk.