Pakistan paramilitary hmun beihnaah sipai 6 an thi

Pakistan hmar thlang lam, Khyber Pakhtunkhwa province-a Bannu hmuna Frontier Constabulary (FC) headquarters chu Thawhlehni khan hel pawlin an bei a, sipai paruk an thih bakah hel paruk an thi tel ve bawk.

Military base bang pawn lam chu thihchilh bomb hmanga beih a nih hnuah, helho hi compound chhungah tlan lutin sipaite nen darkar 12 vel a inkap zui a ni. Sipai paruk an thih bakah hliam 16 an awm a, civil mi pathum an hliam bawk.

Bannu hi Afghanistan ramri bula awm niin, Islam helpawl ho awm tamna a ni. Thawhlehnia pawikhawihna thleng hi eng pawl mahin an tih a nih thu an la sawi lo a, mahse, Pakistan police-te chuan Islam helho tih niin an sawi a, an pawl hming erawh an sawilang lo.

Pakistan leh Afganistan ramri bialah hian Sunni Islamist pawl hrang hrang intelkhawm, Pakistan Taliban tia sawi, Tehreek-e-Taliban Pakistan (TTP) chu an lian ber a, kum 2007 aṭang khan Islamic law hman a nih theihna atan Pakistan sorkar paihthlak tumin an bei tawh a ni.

Rally neihna bula bomb puakah mi 13 an thi

Pakistan chhim thlang lam, Balochistan province khawpui Quetta-ah Thawhlehni vek khan Balochistan National Party (BNP) rally neihna bulah thihchilh bomb a puak a, mi 13 an thi a, hliam 30 an awm.

Police hotu Majeed Qaisrani chuan bomb puahna hi khawpui daia stadium, polical rally neihna hmuna thlanmual bul a ni tih sawiin bomb tipuaktu hi eng pawl mi nge a nih tih erawh hriat a la nih loh thu a sawi. Rally hi provincial chief minister hlui, BNP veteran leader Sardar Ataullah Mengal thih champha puala neih a ni.