Putin-a'n Zelenskyy nena inhmuh a rawtna Ukraine in hnawl

Russia president Vladimir Putin chuan Ukraine president Volodymyr Zelenskyy chu Moscow-ah a zin a nih chuan inbiakna neihpui turin a inpeih tih a sawi a, mahse, Ukraine chuan a rawtna hi a hnawlsak nghal.

Russia-Ukraine indona tihtawp a, inremna siam a nih theihna atan Putin nena inbiakna neih hi Zelenskyy chuan a duh thu a lo sawi tawh a, US president Donald Trump pawhin a hran ve vea inbiakna a neihpui hnuah, hruaitu pahnihte hi hmaichhanah inbe ngei se a duh thu pawh a sawi bawk.

Ukraine foreign minister Andrii Sybiha chuan hruaitu pahnihten meeting an neih hi duh mah se, Russia rama neih erawh an duh lo tih a sawi. Ram pasarihin meeting thlen hi an inhuam thu sawiin, an zingah Austria, Vatican leh Switzerland te pawh an tel a ni, a ti. President Zelenskyy chu meeting nei tur hian a inpeih reng a, mahse, Putin chuan thil a tikhawtlai zel a, rawtna pawm theih lohte a siam zel a ni, a ti. Hruaitu pahnihte hian inbiakna an neih tak tak theihna tur chuan ram dangten Russia hi na zawka an nawr a ngai tih a sawi.

Putin hian China Victory Parade a hmanpuinaa press conference a neihah, Zelenskyy nena inbiakna nei tur chuan inhawng reng tih a sawi a, hemi rual hian meeting nei tur chuan a hma aṭanga inbuatsaihna ṭha tak siam a, meeting awmze nei leh hlawhtling tak a ni tur a ni, a ti. Ram pahnihte inkara boruak ṭha siam a nih theihna tur chuan Ukraine-in martial law a tihtawp a, inthlan a buatsaih phawt a ṭul nia a ngaih thu a sawi bawk.