Israel sipaiten Gaza City 40% thunun tawh

Israel sipaite chuan Gaza City hmun 40% chu an thunun tawh a, beihpui thlak chhunzawm zel an tum tih an sawi. Israel cabinet chuan Gaza City hi an thununna hnuaia dah a nih theihna tura hma lak a lo remti tawh a ni.

Gaza-a Hamas sorkar health ministry thuneitute chuan Ningani khan Israel-in a beihna avangin mi 53 an thi tih sawiin, a tam zawk hi Gaza City-a mite an ni, a ti. Israel sipaite hian Gaza City khawdai pawh an paltlang tawh a, khawpui laili lai chu kilometre tlemte chauhin an hlat tawh nia sawi a ni bawk.

Israel sipai thupuangtu, brigadier general Effie Defrin chuan Hamas infrastructure-te an tichhe zel tih sawiin, Gaza City-a hmun 40% chu kan kutah a awm tawh a ni, a ti. Lak belh zel turin an bei dawn tih a tarlang nghal bawk. "Hamas chu khawi hmunah pawh kan umzui zel dawn a ni," tiin Hamas rorelna tihtawp sak a, Israel mi an hrente an chhuah vek hma chuan an hmalakna chu an kalpui chhunzawm zel tur thu a sawi.

Cabinet-in Israel sipaite thununna hnuaiah Gaza City dah rawtna a pawm hnuah, sipaite hian August 10 aṭang khan Gaza City lak tum hian an bei ṭan a ni. Hei hi ram hrang hrangten an sawisel nasa hle a, hun rei tak Israel-Hamas indona thleng tawh avanga mipuite tawrhna thleng mek belhchhahna tur a ni, an ti. Israel sipaite hian Gaza City-a civil mi chengte chu hmun him lama insaseng turin hriattir mah se, tam tak chu an insawnchhuak duh chuang lo a, hmun him kalna tur dang a awm chuang lo niin an sawi a ni.