Hmeichhiate khuahkhirhna hlip turin Taliban ngen

World Health Organization chuan Afghanistan-a rorellai, Taliban sorkar hnenah Afghan hmeichhia, chhawmdawl hna thawktute laka khuahkhirhna a siam, mipa tel loa zin chhuah a khapna chu hlip turin a ngen.

WHO chuan September 1-a Afghanistan khawchhak lama lirnghing vanga harsatna tawk hmeichhiate puih leh chhawmdawl hna an thawh theihna turin thawktute khuahkhirhna hi hlih thuai a ṭul tih a tarlang. Lirnghing vang hian mi 2,200 chuang an thi a, in leh lo chan tam tak an awm bawk.

Afghanistan-a WHO deputy representative, Dr Mukta Sharma, chuan lirnghinna biala medical staff 90% chu mipa an ni a, a bak 10% chu nurse an ni tih sawiin, hliam tuarte enkawl thei tur an nih thu a sawi. Mahse, an laina mipa tel loa kal chhuah khapsak an nih avangin ṭanpui hna thawh kawngah harsatna an nei a, staff mipate pawh an be ngam lo tih a sawi.

Taliban sorkara thupuangtu leh health ministry lam chuan WHO ngenna hi an la chhang lo. Taliban chuan Islamic dan hnuaia hmeichhiate dikna chanvo chu an zahsak tih an sawi a, harsatna tawk hmeichhiate chhawmdawlna an dawn ngei theihna atana hma an lak tur thu an sawi bawk.

Taliban sorkar hian kum 2022 khan NGO staff zinga hmeichhiate chu pawn lama hna an thawh a lo khapsak tawh a, hmeichhiate chu an kal chhuah dawn pawhin an laina mipaten an kalpui zel tur a ni, tiin thupek a siam a ni. Hei vang hian tuna harsatna an tawh mekah pawh, thawktu hmeichhiate chuan Taliban an hlauh avangin ṭanpui hna thawk tur pawhin anmahniin an kal chhuak ngam lo a ni.