Trump thlawptute'n US Capitol Building luhkhung Congress-in Joe Biden a tling tih nemnghet ta

US president Donald Trump thlawptute chuan an ram huna Nilaini khan Congress session neih laiin US Capitol Building an luh khung a, security force-te nen innawr buaiin buaina chhuak vang hian mi pali an thi. Thi zingah hian police officer silai hmehpuahin a fuh, hmeichhe pakhat a tel. Police-te chuan buaina siamtu zinga mi 52 an man bawk. 

He thil thleng vang hian Washington DC mayor, Muriel Bowser chuan Nilaini zan dar 6 aṭang khan khawpui chhungah curfew a puang nghal a, curfew hi ni 15 chhung atan pawhsei zui a ni bawk. Historian-te chuan Nilainia thil thleng hi kum 1814 hnua nawrh huaihawtte'n Capitol Building an luhkhung vawi khatna niin an sawi. 

Nilaini khan Congress joint session neih niin, nikum November 3-a President thlanna neih takah Joe Biden chu electoral vote hmangin thlan tlin a ni tih tihchianna tur hun an hmang a ni. 

Hetih lai hian Trump thlawptu, inthlan neih taka a chak loh pawm lotu mi tam tak chu US Capitol Building kawtah an pungkhawm a, hun eng emaw chen hnuah vengtute paltlangin Capitol Building hi an lutchilh ta a ni. Nawrh huaihawtten an luhchilh avang hian Congress member-te chu House leh Senate chamber aṭangin an tlanchhe nghal a, ṭhenkhat chu police-te venna hnuaiah an office lamah hruai an ni a, ṭhenkhat chu hmun him lama hruai chhuah nghal an ni bawk. 

Hun eng emaw chen an intihbuai hnuah police-te chuan Capitol Building aṭangin nawrh huaihawtte an nawr chhuak thei a ni.  

US Congress chuan nimin khan official-in an ram President thar atan Democrats Joe Biden chu thlan tlin a ni tih official-in nemnghet ta. President kalchhuak tur Donald Trump thlawptuten inthlan result-a lungawi loa buaina an siam tukah, Congress chuan nikum November thlaa US President thar thlannaah Joe Biden chuan hnehna a chang ta tih hi a rawn nemnghet ta a ni.

Buaina chhuak vanga darkar ruk dawn electoral vote chhiar tihkhawtlai chu nimin khan chhiar zawh niin, vote chhiar zawh hnuah vice president Mike Pence chuan Biden-a'n hnehna a chan thu hi a puang ta a ni.  

US Capitol Building-a buaina a chhuah hnu hian President Donald Trump-a cabinet member-te chuan President a nihna aṭanga Trump paihthlak a nih dan tur an ngaihtuah zui nghal nia sawi a ni. Meeting-ah hian US Constitution 25th amendment chungchang an ngaihtuah a, he dan hmang hian vice president leh cabinet member-te chuan Preident chu a office luah zui zel tlaka an ngai loa nih chuan an paihthla thei a ni. Mahse Donald Trump hi paihthlak a nih dawn chuan vice presidetn Michael Pence-a'n a remtihpui a ngai ang. 

He thutlukna hi an siam thei a nih chuan, President Trump chu a term a hman zawhna tura kar hnih vel chauh hun la awmah US President aṭanga paihthlak a ni thei dawn a ni. House Judiciary Committee-a Demo­crats member-te chuan Vice President Pence hnenah hian lehkha thawnin, Trump chu paihthla turin an ngen.  

President Donald Trump hian US Capitol Building beitute thlawp zawnga twitter-ah thu a post avangin Twitter leh Facebook chuan a account an block sak nghal. Trump hian a twitter-a buaina chawk chhuaktute chu an thiltih titawp a, in lama haw tira a hrilh hmain a hmangaih tih sawiin, Capitol  building luhkhungtute chu ram hmangaihtu tiin a tarlang a ni. Hei bakah hian nikum November thlaa President thlanna neihah thil dik tawk lo a awm tih a sawilang tel bawk. 

Twitter chuan President thu post hi 'Civic Integrity policy' kalh thiin a tweet pathum chu a paihsak nghal a, a hnuah a account hi a block sak zui a ni.

US President-elect Joe Biden chuan Capitol Building-a thil thleng chu na taka a dem thu sawiin, he thil thleng hi helna niin a puh. Biden chuan, "He thil thleng hi lungawi lohn lantira nawrh huaihawtna a ni lo, helna zawk a ni," tiin buaina chawh chhuah tumnaah Trump thlawptute chet dan chu a puh a ni. America chanchina thil lungchhiat thlak tak a nih thu a sawi a, hemi rual hian he buaina chhuah chungchangah mawhphurtuah President Trump chu a puh a ni. 

President Trump chuan TV kaltlanga ram mipuite hnena thuchah sawi a, a intiamna te tipuitling a, ram Danpui venghim a, dik lo taka thiltihte tawpsan tura ngenna siam turin a phut thu Biden chuan a sawi. US President hlui, Barack Obama, Bill Clinton leh Georg W Bush-te pawhin Capitol Building beih a ni chu an dem thu an sawi bawk. 

President Trump thlawptuten US Capitol Building luhkhung a, tharum thawhna an thlen chu ram leh pawl hrang hrang hruaituten an dem thu an sawi. United Nations secretary general Antonio Guterres chuan US-a thil thleng chu pawi a tiin, thil lungchhiatthlak tak niin a sawi. Hetiang thil  thlengah hian political leader-te chuan anmahni thlawptute chu tharum thlen lo zawnga awm tura an fuih a ṭul thu te, democracy kalphung leh dan zah tura an hrilh a ṭul thu a sawi. 

New Zealand, Australia, France, Vene­zuela, Turkey, Germany, Canada,  UK, India leh ram dang hruaitute bakah, NATO leh European Union hruaitute pawhin he thil thleng hi an dem thu sawiin, US President thar tur hnenah boruak ṭha tak hnuaiah thuneihna hlan chhawn a nih theih an beisei thu an sawi bawk.