Japan-ah hri kai thar tam ber ni thleng

Japan ramah Nilaini khan darkar 24 chhungin Covid-19 hri kai thar mi 6,001 an awm a, hei hi Japan ram hri kai tam ber ni a ni.

Thawhlehni khan Japan-ah hian hri kai thar mi 4,916 an awm a, a tuk Nilaini khan hri kai thar mi 6,001 awmin, he ni hi Japan-a Covid-19 hri leng ṭan tirh aṭangin hri kai hmuhchhuah tam ber ni a ni. Japan khawpui Tokyo-ah hian Nilaini khan hri kai thar mi 1,591 hmuhchhuah an ni a, Japan ramah chuan Tokyo khuaah hian hri kai an tam ber a, Saitama leh Chiba-ah pawh mi 394 leh 311 hmuhchhuah an awm ve bawk a ni. 

Hri kai tam berna dawttu khua Kanagawa-ah chuan hri kai thar mi 591 hmuhchhuah an awm ve bawk. Hri kai thar an pun nasat avang hian sorkara thuneitute chuan prime minister Yoshihide Suga chuan ram pumah emer­gency puan a tum hnai niin an sawi. Emergency hi puan a nih chuan February 7 thleng an puan an rin thu sorkar thuneitute chuan an sawi. 

Nikum April 7 khan hri leng vangin Tokyo-ah emergency puan a lo ni tawh a, a hnu rei loteah ram pumah puan zui a ni. Inkhuah­khirhna leh hri leng laka inven dan tur hrang hrangte a rang lama hman nghal a nih vangin nikum May thla khan hri leng vanga emergency puan chu sut leh a ni. 

Hri leng hi a rawn zual leh avang hian emergency puan a ni dawn tia sawi awm mah se PM Suga chuan an rama health expert-te nimin khan rawn a nih dawn thu a sawi a, anni nena thutlukna an siam fel hunah emergency chu puan a ni ang, tiin PM Suga chuan a sawi a ni.