UNDP-in Libya-a school pathum ṭanpui

United Nations Deve­lopment Program (UNDP) chuan Libya khawpui Tripoli-a khawchhak lama armed force leh UN thlawp sorkar sipaite innghir­nghona avanga school tihchhiat  pathumte chu a ṭanpui dawn thu a puang.

Tripoli-a school-te hi Abdulbasit Al Hamroni School, Al Hakh Revolution School leh Al Jelani Al Gargoti School-te an ni a, UNDP chuan Libya stabilization (project) kaltlangin heng school-te thawmṭhat leh an nih dawn thu hi Nilaini khan a puang a ni.  

Tripoli-ah hian innghir­nghona avanga school tihchhiat hi 14 vel a awm. Heng school-te thawmṭha turte hi zawhfel a nih hunah chuan zirlai 1,190-te chuan an zirna an chhunzawm thei dawn a, zirna ṭha zawk school-ah an dawng thei dawn a ni tiin UNDP chuan thuchhuah a siam. 

Libya khawpuiah hian tun hma aṭang tawhin khawchhak lama armed force leh UN thlawp sorkar sipaite chu an lo innghir­ngho fo tawh a, buaina tam tak a chhuah phah a ni. Libya khawthlang lamah hian UN thlawp sorkar sipaite chuan khawchhak lama armed force-te hi an tlawm thu an lo puang tawh a, nikum June thla khan hemite pahnih inkara buaina chu a lo tawp fel ta niin khawthlang media-te chuan an tarlang.