France Parliament-in PM Bayrou paihthla

France parliament, National Assembly-ah Thawhṭanni khan prime miniter François Bayrou chu rintawkna fiahna a paltlang zo lo a, vote hmanga paihthlak a ni.

National Assembly-a vote lakah, Bayrou ring tawk lo lamah vote 364 tlain, a thlawp lamah vote 194 a tla thung. Nimin khan Bayrou kaihhruai sorkar chuan president Emmanuel Macron hnenah banna an theh lut nghal bawk. Eptu lam chuan Parliament ṭhiat a inthlan buatsaih an phut a, mahse, President chuan prime minister thar a ruat zawk dawn tih a sawi. Hei hi kum hnih chhunga prime minister vawi nga an neihna tur a ni ang.

Bayrou hian an ramin leiba a neihte tihziaawmna tura hma lak a tumnaah 2026 budget-ah national holiday pahnih titawp a, welfare fund leh pension-te tihtawp a rawt a, hemi hmang hian € tld 44 vel hum theih a tum a ni. Mahse hei hi eptu lamin an thlawp lo a, a bikin penson tihtawp a tum chuan sawisel a hlawh hle. Hei vang hian Bayrou hian Parliament-ah confidence vote la tura tiin, vote laknaah amah ep lamah left leh hard-right party lam an ṭandun tak avangin a paltlang zo ta lo a ni.

Vote lak a nih hma hian Bayrou chuan politics lam leh thuneihna ringawt aiin an ram dinhmun tur chu a ngaihtuah zawk tih sawiin, MP rualte hnenah France-in sum lama harsatna a nei leh, mi dang rinchhan loa a awm theihna a hloh a nih chuan ṭhangthar lo awm turte chu a tuar tur an nih thu a hrilh. Economist tam zawk pawhin France hian sum lamah harsatna a tawk chho dawn niin an sawi a, kum 2030-a leiba € tld 30 a neih chu kum 2030-ah € tld 100 chuang a tling tawh dawn niin an sawi.