UK-ah Covid-19 hri kai tam ber ni thleng

United Kingdom health ministry chuan Nilaini khan darkar 24 chhungin an ramah Covid-19 hri kai mi 62,322 an awm tih a tarlang a, hei hi ni khat chhunga UK-a Covid-19 hri kai tam ber ni a ni. 

Nilaini vek khan UK-ah hian Covid-19 hri vanga thi  mi 1,041 an awm bawk a, hei hi nikum April thla hnua ni khat chhunga thi tam ber ni a ni. Nilainia thi report-te nen hian UK-a Covid-19 vanga thi chu mi 77,346 an awm tawh a, hri kai tawh zawng zawng hi mi 28,36,801 an awm tawh bawk.

Thawhlehni leh Nilaini khan UK-a Covid-19 hri kai thar hi mi 60,000 an chuang ve ve a ni. Hri kai damdawi-ina enkawl mek hi mi 30,000 chuang an awm bawk a, anni nen hian damdawi-ina enkawl loh nen hri la kai mek mi 14,13,631 an awm. Hri kai enkawl dam tawh zawng zawng hi mi 13,45,824 an tling tawh a ni. 

UK prime minister Boris Johnson chuan an ramah hri kai an punchhoh leh tak avangin Thawhṭanni khan England-ah lockdown a lo puan phah tawh bawk. India-a a zin tur pawh Johnson chuan hri leng vangin a ṭulh phah tawh bawk.