France PM thar atan Sebastien Lecornu ruat

France parliament-in rintawk lohna vote hmanga prime minister aṭanga Francois Bayrou an paihthlak hnuah, president Emmanuel Macron chuan Thawhlehni khan prime minister thar atan kum 39 mi Sebastien Lecornu a ruat.

Francois Bayrou hi an ramin leiba a ngah tihziaawmna tur welfare fund leh pension tihtawpna tura ruahmanna a siamte eptu lamin an duhpui loh avangin Thawhṭanni khan vote hmangin paihthlak a ni.

Prime minister thar atana ruat, Sebastien Lecornu hi kum nga chhunga France PM pangana tur a ni. President office chuan a cabinet member turte a ruat hmain budget leh policy chungchangah party hrang hrangte chu inbiakna neihpui phawt tura tih a nih thu a tarlang. Left party zingah Lecornu duh leh duh lo an awm a, hard-left France Unbowed party chuan rintawk lohna motion put luh an tum tih an sawi. Mahse, far-right National Rally (RN) party president Jordan Bardella chuan Lecornu hi an thlawp dawn tih a sawi avangin parliament-ah fiah a nih pawhin a paltlang theih rin a ni.

Lecornu hi kum 18 a pum tirhin Normandy khaw mayor a lo ni tawh a, kum 22-a nihin president hlui Nicolas Sarkozy-a sorkarah adviser a ni bawk. Kum 2017-a president atana Macron thlan tlin a nih khan Les Republicains party chhuahsanin Macron-a party a zawm a, re-election campaign pawh a kaihhruaina hnuaiah neih a ni. Macron hian minister-ah a dah zui ta bawk.