Nepal hruaitu tur la ruat lo

Nepal rama tualchhung buaina nasa tak chhuak vanga prime minister aṭanga KP Sharma Oli a ban hnuah an ram hruaitu tur hi thlan a la ni lo a, chief justice hlui Sushila Karki chu hruaitu lailawk atana ruat a nih rin a ni a, mahse tihfel a la ni lo.

Army chief general Ashok Sigdel chuan nawrh huaihawtnaa bul tumtu, Gen Z aiawhte leh nawrhnaa inhnamhnawih dang aiawhte chu hruaitu ruat tur chungchangah inbiakna a neihpui tawh niin sipai thupuangtu chuan a sawi a, mahse, an inbiakna neih dan kimchang erawh a tarlang lo.

Thawhṭannia social media platform hrang hrang khap duh lohna lantira nawrh huaihawt a nih aṭangin buaina hi a punlun zel a, a hnuah sorkar lakah lungawi lohna lantir chhunzawm niin nawrh huaihawtte hian Parliament bakah sorkar building eng emaw zat an hal zui bawk. Buaina chhuak vanga thi hi nimin thleng khan mi 30 an tling tawh a, mi 1,033 an hliam bawk niin health ministry chuan a tarlang.

Nimin khan Madhesh province-a Ramechhap district tan-ina tang leh security mi leh sate inbeihna thlengah tang zinga mi pathum an thi a,tualchhung buaina a chhuah hnuah tan-in 20 chuang aṭangin mi tang 15,000 an tlan chhuak tawh bawk. Nepal Army, Armed Police Force leh Nepal Police te chuan tang tlanchhuakte hi man leh tumin an zawng mek a ni.

Nimin zing aṭang khan Kathmandu valley-a district pathum - Kathmandu, Lalitpur leh Bhaktapur-a tiam chin awm loa curfew puan chu tihtawp a ni. Khawpui chhungah sipaite an la duty chhunzawm reng a, boruak pawh a ziaawm chho tawh tih an sawi.