Brazil President hlui Bolsonaro kum 27 tang turin hrem

Brazil Supreme Court chuan an ram president hlui, Jair Bolsonaro chu sipai chakna hmanga sorkar paihthlak tuma puhna thubuaiah thiam loh a chantir a, jail-ah kum 27 leh thla thum tang turin a hrem.

Supreme Court judge panga awmna panel chuan an ram huna Ningani khan Bolsonaro hi thiam loh an chantir hnu rei loteah a hremna tur pawh an tichhuak nghal a ni. Kum 2022 inthlana Luiz Inácio Lula da Silva a hneh zawh loh hnuah, Bolsonaro hian thuneihna chan chhunzawm zel tumin sorkar thar paihthlak tuma phiarrukna chu a kaihruai niin an puh a ni.

Justice palite chuan Bolsonaro hi a thubuaia thiam loh an chantir a, pakhat erawhin thiam a chantir thung. Court hian thiam loh a chantir bakah kum 2033 thleng inthlan a chuh a khap bawk. Sorkar paihthlak tuma puhna kaihhnawihah Bolsonaro hi thubuai panga siam sak a ni a, a thubuai dang paliah thiam loh chantir a nih leh chuan kum 40 chuang tang tura hrem theih a ni ang.

Kum 70 mi, Bolsonaro hi house arrest-a hren mek a ni a, Ningania a chungthu ngaihtuahnaah pawh hian court-ah a inlan lo. A ukil-te chuan court thutlukna hi sawiselin, appeal an tum tih an sawi. A tan hun titlem tur leh, jail-a dah kher loa house arrest-ah dah chhunzawm turin dil an tum nia sawi a ni. An puhnate hi thu dik lo a nih thu Bolsonaro chuan a lo sawi tawh ṭhin a, nakkuma an ram President thlanna neih tura chuh thei lo tura siam an tumna mai niin a sawi ve thung.